Ek Aag Ka Dariya Hai Poetry
ek lafz-e-mohabbat ka adna ye fasana hai
ik lafz-e-mohabbat kā adnā ye fasānā hai
simTe to dil-e-āshiq phaile to zamānā hai
ye kis kā tasavvur hai ye kis kā fasānā hai
jo ashk hai āñkhoñ meñ tasbīh kā daanā hai
dil sañg-e-malāmat kā har-chand nishānā hai
dil phir bhī mirā dil hai dil hī to zamānā hai
ham ishq ke māroñ kā itnā hī fasānā hai
rone ko nahīñ koī hañsne ko zamānā hai
vo aur vafā-dushman māneñge na maanā hai
sab dil kī sharārat hai āñkhoñ kā bahānā hai
shā.ir huuñ maiñ shā.ir huuñ merā hī zamānā hai
fitrat mirā ā.īnā qudrat mirā shānā hai
jo un pe guzartī hai kis ne use jaanā hai
apnī hī musībat hai apnā hī fasānā hai
kyā husn ne samjhā hai kyā ishq ne jaanā hai
ham ḳhāk-nashīnoñ kī Thokar meñ zamānā hai
āġhāz-e-mohabbat hai aanā hai na jaanā hai
ashkoñ kī hukūmat hai aahoñ kā zamānā hai
āñkhoñ meñ namī sī hai chup chup se vo baiThe haiñ
nāzuk sī nigāhoñ meñ nāzuk sā fasānā hai
ham dard-ba-dil nālāñ vo dast-ba-dil hairāñ
ai ishq to kyā zālim terā hī zamānā hai
yā vo the ḳhafā ham se yā ham haiñ ḳhafā un se
kal un kā zamāna thā aaj apnā zamānā hai
ai ishq-e-junūñ-pesha haañ ishq-e-junūñ-pesha
aaj ek sitamgar ko hañs hañs ke rulānā hai
thoḌī sī ijāzat bhī ai bazm-gah-e-hastī
aa nikle haiñ dam-bhar ko ronā hai rulānā hai
ye ishq nahīñ āsāñ itnā hī samajh liije
ik aag kā dariyā hai aur Duub ke jaanā hai
ḳhud husn-o-shabāb un kā kyā kam hai raqīb apnā
jab dekhiye ab vo haiñ ā.īna hai shānā hai
tasvīr ke do ruḳh haiñ jaañ aur ġham-e-jānāñ
ik naqsh chhupānā hai ik naqsh dikhānā hai
ye husn-o-jamāl un kā ye ishq-o-shabāb apnā
jiine kī tamannā hai marne kā zamānā hai
mujh ko isī dhun meñ hai har lahza basar karnā
ab aa.e vo ab aa.e lāzim unheñ aanā hai
ḳhuddārī-o-mahrūmī mahrūmī-o-ḳhuddārī
ab dil ko ḳhudā rakkhe ab dil kā zamānā hai
ashkoñ ke tabassum meñ aahoñ ke tarannum meñ
ma.asūm mohabbat kā ma.asūm fasānā hai
aañsū to bahut se haiñ āñkhoñ meñ 'jigar' lekin
bañdh jaa.e so motī hai rah jaa.e so daanā hai
ek lafz-e-mohabbat ka adna ye fasana hai
simTe to dil-e-ashiq phaile to zamana hai
ye kis ka tasawwur hai ye kis ka fasana hai
jo ashk hai aankhon mein tasbih ka dana hai
dil sang-e-malamat ka har-chand nishana hai
dil phir bhi mera dil hai dil hi to zamana hai
hum ishq ke maron ka itna hi fasana hai
rone ko nahin koi hansne ko zamana hai
wo aur wafa-dushman manenge na mana hai
sab dil ki shararat hai aankhon ka bahana hai
shair hun main shair hun mera hi zamana hai
fitrat mera aaina qudrat mera shana hai
jo un pe guzarti hai kis ne use jaana hai
apni hi musibat hai apna hi fasana hai
kya husn ne samjha hai kya ishq ne jaana hai
hum KHak-nashinon ki Thokar mein zamana hai
aaghaz-e-mohabbat hai aana hai na jaana hai
ashkon ki hukumat hai aahon ka zamana hai
aankhon mein nami si hai chup chup se wo baiThe hain
nazuk si nigahon mein nazuk sa fasana hai
hum dard-ba-dil nalan wo dast-ba-dil hairan
ai ishq to kya zalim tera hi zamana hai
ya wo the KHafa hum se ya hum hain KHafa un se
kal un ka zamana tha aaj apna zamana hai
ai ishq-e-junun-pesha han ishq-e-junun-pesha
aaj ek sitamgar ko hans hans ke rulana hai
thoDi si ijazat bhi ai bazm-gah-e-hasti
aa nikle hain dam-bhar ko rona hai rulana hai
ye ishq nahin aasan itna hi samajh lije
ek aag ka dariya hai aur Dub ke jaana hai
KHud husn-o-shabab un ka kya kam hai raqib apna
jab dekhiye ab wo hain aaina hai shana hai
taswir ke do ruKH hain jaan aur gham-e-jaanan
ek naqsh chhupana hai ek naqsh dikhana hai
ye husn-o-jamal un ka ye ishq-o-shabab apna
jine ki tamanna hai marne ka zamana hai
mujh ko isi dhun mein hai har lahza basar karna
ab aae wo ab aae lazim unhen aana hai
KHuddari-o-mahrumi mahrumi-o-KHuddari
ab dil ko KHuda rakkhe ab dil ka zamana hai
ashkon ke tabassum mein aahon ke tarannum mein
masum mohabbat ka masum fasana hai
aansu to bahut se hain aankhon mein 'jigar' lekin
bandh jae so moti hai rah jae so dana hai
Videos
This video is playing from YouTube
Abida Parveen
RECITATIONS
Fahad Husain
JIGAR MORADABADI - EK LAFZ E MOHABBAT KA ADNA YE Fahad Husain
Also part of
20 Evergreen Ghazals of Ustad Shayar
Everyone who loves classical Urdu Ghazals remembers these Kalams by heart. If you are still unaware of these classic gems, do read here.
Additional information available
Click on the INTERESTING button to view additional information associated with this sher.
OKAY
rare Unpublished content
This ghazal contains ashaar not published in the public domain. These are marked by a red line on the left.
OKAY
You have remaining out of free poetry pages per month. Log In or Register to become Rekhta Family member to access the full website.
Source: https://www.rekhta.org/ghazals/ik-lafz-e-mohabbat-kaa-adnaa-ye-fasaanaa-hai-jigar-moradabadi-ghazals